An pé lévé chak maten adan on péyi étranjé. An pé maché chak jou anba lapli. An pé étenn lespri an mwen pou ay travay kon robo chak jou Bondyé fè. An pé maché kon zonbi é ay fè tousa mwen ni pou fè san kalkilé twòp. Kon otomat. An pé kontinyé konsa lotan si tini mizik. Si kaks an mwen anlè zorey an mwen pou kouté listwa a Captain Rugged, an ké pé kontinyé alé. Si lè mwen ka maché-kouri-pédalé an lari a moun la, sé on Balad Kréyòl ki ka dousiné mwen, an ké pé kontinyé alé.
An ké pé sizé douvan lanmè pou sonjé péyi la si konk a Jazz Ka Philosphy ka soné an tchè an mwen. An ké pé lésé dlo koulé an zyé an mwen lè mwen ka sonjé Trayvon é kouté Strange fruits.
La vi a ka woulé woulé ay, tan la ka pasé, lanmizè ka kontinyé é mwen la ka gadé tousa ki ka fèt, doulè ki ka tonbé anlè moun, menm goumé la ki ka rikoumansé chak jou. Nonm ki ka détrui planèt la. On boug fou ka kriyé byento tousa ké fin! An ka gadé syèl la é si démen an ka vwè twa boug ki ka désann anlè chouval a yo, an péké menm étoné. Sé foukan la vi la ka foukan é mwen pa étoné. La vi la té ja an pangal lè mwen vwè jou é chak jou sa ka vin pli mové.
Si tini gwoka é gospel, tini tibwen lespwa an tchè an mwen é mwen ké pé kontinyé vansé.
