Tag: Manman Dlo

45

  By

Sé la mwen ké fin. Anba gran dlo la. Lè mwen ké mò, pa téré mwen. Pa téré mwen fanmi. Souplé zanmi, sonjé sa byen. Pa téré mwen. Voyé mwen alé an mitan loséan. Lésé kò an mwen koulé anba gran dlo la.

Sé volé lespri an mwen ké volé. Sé koulé kò an mwen ké koulé. Mwen ké gadé kò la ka disparèt an dlo la. Dlo la ka disparèt an kò la. Mwen ké gadé kò la ka tonbé pou ay kouché an gran simityè la. Anba dlo. Kon sa ki pasé avan mwen.

Fanmi, o fanmi ki vwayajé avan mwen. Fanmi ki tonbé an dlo la avan mwen. Mwen ké vin jwen zòt anba gran dlo la. Lanné pasé mé mwen pa oubliyé zòt. Mwen ka sonjé zòt touléjou. Sé kò a zòt tousèl ki disparèt an dlo la. Vwa a zòt, lespri a zòt la toujou. Mwen ka sonjé zòt.

Lè mwen ké mò, mwen vlé vin kouché an gran simityè la anba dlo. Mwen vlé vin gadé si lanmò pli dous anba lanmè. Vin kouté jan sirèn ka chanté. On zafè a dlo épi sèl. Kouté yo ka chanté toupandan kò an mwen ka chanjé. Toupandan dlo la ka antré an kò la, sèl la ka kolé anlè po la.

Sé lè mwen ké mò mwen ké las chanté. mwen ké kouché anba dlo. Kouté sirèn chanté.

 

42

  By

Mwen vlé vwè dlo épi sèl assou lapo

Si tini on koulè myèl assou lapo

Sav tout kò mwen sé sèl jis an mitan zo

Tout kò mwen sé sèl ki sòti an dlo

Sé sa tousèl mwen ka sonjé. On ti mélodi é on vwa ki téké chanté “dlo épi sèl”. Anba dlo la, pon moun patéka tann mwen. Mwen tonbé, mwen tonbé, mwen tonbé. mwen tonbé, mwen pa jen rivé anba. Mwen pa jen rivé an fon a dlo la. Mwen tonbé telman lontan. Mwen konprann tout vi an mwen té kay pasé konsa. Tonbé. Sé tonbé mwen ka tonbé anba dlo. Mwen ouvè bouch an mwen pou kriyé mé pon son pa sòti, sé dlo tousèl ki rantré. Pon moun pa tann mwen mé mwen tann yo. Mwen yo ka chanté. On zafè a dlo épi sèl. Mwen santi dlo la ki té ka rantré an kò an mwen. Mwen santi mwen ka chanjé. Tout kò mwen ka chanjé. Mwen santi gou a lanmè an bouch an mwen. Sèl. Sèl an bouch an mwen. Dlo an kò an mwen. Dlo épi sèl. Mwen santi mwen paka tonbé ankò. Mwen pa anvi kriyé ankò. Anba dlo la, pani hélé an mwé. Sé silans ki mèt. Mwen pa tann pon moun ka palé. On ti chanté tousèl ka soné olwen. On zafè a dlo épi sèl. Sèl an bouch an mwen, dlo an kò an mwen. Sé mwen ki dlo épi sèl. Lè mwen lévé tèt an mwen pou gadé syèl, mwen vwè bato la ki ka pati. Yo voyé mwen alé an dlo la kon zòdi é aprézan yo ka pati chayé fanmi an mwen alé an péyi étranjé. Yo konprann mwen néyé é yo ja chapé, kontinié fè travay a yo. Chayé mizè alé lòt koté lanmè. Voyé doulè néyé anba loséan. Mwen néyé. Mwen néyé fanmi mé mwen pa mò. Mwen pa mò, mwen chanjé. Kriyé mwen Manman Dlo, Simbi, Yémanja, yemaya, Mamy Wata. Mwen vivan anba dlo la é mwen ka sonjé zòt.

mamy wata