Mwen ja maché a goch a dwat. Mwen ja kouri tout koté. Mwen ja gadé douvan, mwen ja touné pou gadé dèyè. Mwen ja rété doubout san boujé, pa menm souflé two fò. Rété la ka kouté. Pani tanbou!
Pani tanbou an péyi an moun la mézanmi! Pani tanbou! Ka mwen kay fè? Kijan mwen pé viv?! Kijan mwen ké pé maché an péyi a yo la? Mwen ja ka santi mwen ka maché an mannyè kwochi. Mwen ka manké tonbé. Pani tanbou an péyi a moun la!
Mwen ja gadé tout frè, tout sè mwen ka vwè an lari a yo la. Mwen ja mandé yo ki koté yo sòti. Kijan yo fè rivé la. Es sé la dévenn ki té enmé yo menm mannyè i enmé mwen, ki fè yo rivé isidan? Ka yo menné an sak a yo? Ki mizik yo chayé èvè yo? O tanbou la, frè an mwen? Es ou menné tanbou aw?
Ka ou ka di? Pani tanbou? Ay, mézanmi, mwen ka santi mwen ja ka pèd fòs. Tchè an mwen paka bat menm jan la i té ka bat avan. Kadans la chanjé. I tibwen las, i an rita. Kò an mwen ka vansé on mannyè molokòy. Mwen ka éséyé frapé lanmen mé son la pa bèl. I pa ka ban mwen pon fòs. Tanbouyé o tanbouyé! Mwen savé byen ou ka vwayajé. Ou ka menné tanbou aw tout koté pou fè tchè a moun kontan. Ou ka menné tanbou aw tout koté mé ou paka mennéy la mwen yé a menm! Ay! Mwen maléré! Tanbou o tanbou! Ou pa’a tann mwen ka kriyéw? Ou pa’a santi lè mwen ka chanté, sé pléré mwen ka pléré?
Mwen ja gadé a lantou mwen. mwen ja kouté byen é mwen tann tout kalité mizik. Mwen jis alé fè tout kalité mizik mé pani ayen ki ka soné kon son a tanbou Gwadloup. Tanbouyé, mwen péké las chèchéw. Si ou la, on koté, an péyi a yo la, mwen ké touvéw.
