Mwen vlé vwè dlo épi sèl assou lapo
Si tini on koulè myèl assou lapo
Sav tout kò mwen sé sèl jis an mitan zo
Tout kò mwen sé sèl ki sòti an dlo
Sé sa tousèl mwen ka sonjé. On ti mélodi é on vwa ki téké chanté “dlo épi sèl”. Anba dlo la, pon moun patéka tann mwen. Mwen tonbé, mwen tonbé, mwen tonbé. mwen tonbé, mwen pa jen rivé anba. Mwen pa jen rivé an fon a dlo la. Mwen tonbé telman lontan. Mwen konprann tout vi an mwen té kay pasé konsa. Tonbé. Sé tonbé mwen ka tonbé anba dlo. Mwen ouvè bouch an mwen pou kriyé mé pon son pa sòti, sé dlo tousèl ki rantré. Pon moun pa tann mwen mé mwen tann yo. Mwen yo ka chanté. On zafè a dlo épi sèl. Mwen santi dlo la ki té ka rantré an kò an mwen. Mwen santi mwen ka chanjé. Tout kò mwen ka chanjé. Mwen santi gou a lanmè an bouch an mwen. Sèl. Sèl an bouch an mwen. Dlo an kò an mwen. Dlo épi sèl. Mwen santi mwen paka tonbé ankò. Mwen pa anvi kriyé ankò. Anba dlo la, pani hélé an mwé. Sé silans ki mèt. Mwen pa tann pon moun ka palé. On ti chanté tousèl ka soné olwen. On zafè a dlo épi sèl. Sèl an bouch an mwen, dlo an kò an mwen. Sé mwen ki dlo épi sèl. Lè mwen lévé tèt an mwen pou gadé syèl, mwen vwè bato la ki ka pati. Yo voyé mwen alé an dlo la kon zòdi é aprézan yo ka pati chayé fanmi an mwen alé an péyi étranjé. Yo konprann mwen néyé é yo ja chapé, kontinié fè travay a yo. Chayé mizè alé lòt koté lanmè. Voyé doulè néyé anba loséan. Mwen néyé. Mwen néyé fanmi mé mwen pa mò. Mwen pa mò, mwen chanjé. Kriyé mwen Manman Dlo, Simbi, Yémanja, yemaya, Mamy Wata. Mwen vivan anba dlo la é mwen ka sonjé zòt.
