Lévé sanmdi, pani travay jodi. Trapé soulyé, sòti, kouri. Mwen kouri, mwen kouri, mwen kouri. Mwen kouri jistan mwen rivé bòd lanmè. Bòd lanmè pa lwen, sé sa mwen toujou tann yo di. Bòd lanmé té lwen la mwen téka rété la. I té lwen menm. Mwen té pé kouri kouri an mwen tout la jouné, kouri tout lannuit, kouri ankò san mwen pa jen rivé kontréy. Bòd lanmè. A pa ti chèché mwen ja chèchéw.
Bo maten, mwen lévé, trapé soulyé é mwen kouri. Mwen kouri anlè trotwa. Mwen soté douvan fé wouj, mwen gadé loto ka woulé, ka anpéché mwen kontinyé. Mwen arété, mwen soté, mwen maté, mwen gadé fé wouj la ki pa té vlé chanjé koulè menm. Mwen fenmé zyé an mwen pou kalmé kò an mwen, kité kolè a chapé. Mwen ouvè zyé an mwen pou gadé fé la chanjé koulè é mwen kouri ankò. Mwen kouri jistan mwen rivé bòd lanmè.
Lanmè isi paka sanm lanmè a mwen té konèt lè mwen té piti. Lanmè cho a ki ka mandéw vin bengné, vin jouwé, vin révé. Oubliyé tousa ki mové. Oubliyé sa ki té fèw soufè. Vini néyé doulè. I paka sanm lanmè a mwen té konèt lè mwen té piti mé i ka chanté menm ti chanté la. Mwen ka tann sirèn ka chanté olwen. Sé menm sirèn la ki té fè mwen kwè an té touvé plas an mwen. Tala menm ki té di mwen mwen sé moun isi. Timoun a soley.
Lanné pasé é jodi mwen pa menm sèten ki moun an yé. Ola mwen ké alé. Koté mwen ké rété. Sèl biten mwen sèten, mwen bizwen rété koté lanmè. Kouri é alé kouté vwa ay. Kouté son a lanmè lè i ka chanté ban mwen. Lanné pasé mé mwen paka santi mwen gran. Lanmè gran é mwen piti. Mwen ka gadéy é mwen savé byen mwen péké rivé janbéy jodi. Jodi sé pri mwen pri isi-a.
Mwen té vlé vwayajé, alé lwen, lésé tout mové lidé dèyè. Mwen janbé lanmè-rivé isidan. Mwen kouri pou vini sizé douvan lanmè a é gadé olwen. Sé koumansé chimen la ka koumansé. Mwen ké pran fòs pou maché lontan. Mwen ké pran bon fòs pou soté ho é lwen. Mwen ké rivé janbé lanmè.